КЫЗМАТ КӨРСӨТҮҮ БОЮНЧА АЙКЫН ОФЕРТА КЕЛИШИМИ (ЖАЛПЫ ЖАРЫЯ-СУНУШ)
Бишкек ш.
Мындан ары «Аткаруучу» деп аталуучу «ВИП Лаундж» ЖЧКсынын атынан Уставдын негизинде иш алып барган директору У.М. Отунчиев жана төмөндө көрсөтүлгөн шарттарда ушул сунушту кабыл алган кайсы болбосун жак, мындан ары «Колдонуучу» деп аталып, экинчи тараптан, мындан ары оферта келишиминин «Тараптары» деп аталышат.
1. ТЕРМИНДЕР:
1.1. Оферта – Аткаруучунун кызмат көрсөтүү келишимин түзүүнүн шарттарын жөнгө салуучу, https://www.vip-lounge.kg сайтында жарыяланган ушул айкын сунушу.
1.2. Аткаруучу – Кыргызстандын аэропортторунда атайын тейлөө кызматтарын ээлеп коюу жана төлөө боюнча кызматтарды көрсөтүүчү «ВИП Лаундж» жоопкерчилиги чектелген коому.
1.3. Колдонуучу – https://www.vip-lounge.kg сайтында Аткаруучунун кызматтарын өзүнүн же үчүнчү жактардын пайдасына сатып алууга буйрутма берген ар кандай жеке жак.
1.4. Сайт – Интернет тармагында https://www.vip-lounge.kg дарегине ээ болгон, Аткаруучу тарабынан көзөмөлдөнүүчү сайт.
1.5. Буйрутма – Колдонуучунун Сайтта көрсөтүлгөн аэропорттордо кызматтарды алууга тийиштүү түрдө таризделген суроо-талабы.
1.6. Ээлеп коюу (брондоо) системасы (Система) – кызматтар жөнүндө маалыматты, алардын тарифтерин, аларды колдонуу эрежелерин, ошондой эле сунушталган кызматтарды көрсөтүүнүн башка шарттарын камтыган, Колдонуучуларга Сайтта берилген кызматтарды онлайн ээлеп коюу системасы.
1.7. Кызматтар – Кыргызстандын аэропортторунда көрсөтүлүүчү жана Системанын ээлеп коюу интерфейсинде көрсөтүлгөн ар кандай кызматтар.
2. КЕЛИШИМДИН ПРЕДМЕТИ
2.1. Аткаруучу Колдонуучунун буйрутмасы боюнча Сайтта каралган шарттарга ылайык кызматтарды көрсөтүүгө милдеттенет, ал эми Колдонуучу бул кызматтарды кызматтар үчүн төлөө күнүнө карата колдонулуп жаткан тарифтер боюнча төлөөгө милдеттенет.
2.2. Кыргыз Республикасынын Жарандык кодексинин 399-беренесинин 3-бөлүгүнө ылайык ушул Офертанын шарттарын сөзсүз акцептөө (кабыл алуу) (Келишимди түзүү учуру) Колдонуучу тарабынан Сайттагы кызматтарды төлөө болуп саналат.
3. ЖАЛПЫ ЖОБОЛОР
3.1. Система аркылуу кызматтарга буйрутма берүү менен, Колдонуучу ушул Айкын оферта келишиминин (мындан ары – Келишим) шарттары менен таанышкандыгын жана ага сөзсүз макул экендигин ырастайт.
3.2. Ушул Келишим, ошондой эле Сайтта көрсөтүлгөн кызматтар жөнүндө маалымат Кыргыз Республикасынын Жарандык кодексинин 396-беренесине жана 398-беренесинин 2-бөлүгүнө ылайык айкын оферта болуп саналат.
3.3. Маалыматы Сайтта жайгаштырылган бардык кызматтарды Аткаруучу жана бул кызматтарды түздөн-түз көрсөтүүчү кызмат көрсөтүүчүлөр аткарышат.
3.4. Аткаруучу ушул Келишимге өзгөртүүлөрдү киргизүү укугун өзүнө калтырат. Аткаруучу Жалпы жарыя-сунушту бир тараптуу тартипте өзгөртүүгө же кайтарып алууга укуктуу. Бардык өзгөртүүлөр күчүнө кирет жана Сайтта жайгаштырылган учурдан тартып Колдонуучунун маалыматына жеткирилген деп эсептелет. Оферта өзгөртүлгөн же кайтарылып алынган учурга чейин таризделген буйрутмалар, алар таризделген учурда колдонулуп жаткан Офертанын шарттары боюнча аткарылат.
3.5. Колдонуучу Сайттагы "төлөө" баскычын басуу менен Келишимге макул болот. Ушул Келишимдин шарттарына макул болуу менен, Колдонуучу өзүнүн укуктарын жана аракетке жөндөмдүүлүгүн, финансылык мүмкүнчүлүгүн ырастайт, ошондой эле ушул Келишимди түзүүнүн натыйжасында өзүнө жүктөлгөн милдеттенмелер үчүн жоопкерчиликти түшүнөт. Колдонуучу өзүнүн жеке маалыматтарынын, ошондой эле жүргүнчүлөрдүн (үчүнчү жактардын) маалыматтарынын аныктыгын ырастайт жана алардын тактыгы, толуктугу жана аныктыгы үчүн бардык жоопкерчиликти өзүнө алат. Колдонуучу жеке маалыматтарды же даталар, каттам номерлери ж.б.у.с. маалыматтарды берүүдө каталарды, так эместиктерди кетирүү боюнча өзүнүн аракеттерине байланыштуу бардык мүмкүн болгон коммерциялык тобокелдиктерди (жаңы буйрутманы тариздөө, тарифти өзгөртүү, акчаны кайтаруу ж.б.) өзүнө алат.
3.6. Ушул Офертаны кабыл алуу менен, Колдонуучу көрсөтүлүүчү кызматтын тартиби жана деталдары жөнүндө маалымдама менен маалыматтык таркатманы алууга өз макулдугун берет.
4. БУЙРУТМАНЫ ТАРИЗДӨӨ
4.1. Буйрутма Колдонуучу тарабынан Сайтта өз алдынча таризделет.
4.2. Буйрутманы тариздөөдө Колдонуучу Ээлеп коюу системасында «милдеттүү» деп көрсөтүлгөн бардык талааларды толтурушу керек.
4.3. Колдонуучу тарабынан таризделген буйрутмалар «Төлөндү» статусун алганда акыркы мүнөзгө ээ болот.
5. БУЙРУТМАНЫ ТӨЛӨӨ
5.1. Буйрутма учурундагы кызматтардын актуалдуу баасы Системада ар дайым көрсөтүлөт. Кызматтардын баасы Кыргыз Республикасынын колдонуудагы мыйзамдарында каралган бардык салыктарды эске алуу менен көрсөтүлгөн.
5.2. Ушул Келишим боюнча эсептешүүлөр кызматтардын наркынын 100% өлчөмүндө алдын ала төлөө түрүндө жүргүзүлөт. Кызматтар Аткаруучу алдын ала төлөмдүн толук суммасын алгандан кийин көрсөтүлөт.
5.3. ВИП-залдардагы кызматтардын комплекстүү топтомуна кирбеген кызматтар Колдонуучу (же Буйрутмада аты аталган үчүнчү жак) тарабынан өзүнчө төлөнөт.
5.4. Буйрутманы банктык карталар аркылуу төлөөнүн өзгөчөлүктөрү:
5.4.1. Банктык карталар боюнча операциялар карта ээси же ал ыйгарым укук берген жак тарабынан жүргүзүлөт.
5.4.2. Банктык карталар боюнча операцияларды авторизациялоо банктык картаны чыгарган кредиттик уюм (мындан ары – Банк) тарабынан ишке ашырылат. Эгерде Банкта операция алдамчылык мүнөзгө ээ деп эсептөөгө негиздер болсо, Банк бул операцияны жүргүзүүдөн баш тартууга укуктуу.
5.4.3. Банктык карталарды колдонуу менен төлөмдөрдү кабыл алуу жана иштетүү электрондук төлөм провайдери тарабынан жүргүзүлөт. Аткаруучу банктык карталардын маалыматтарын иштетүүнү, анын ичинде чогултууну жана сактоону ишке ашырбайт.
6. БУЙРУТМАНЫ ӨЗГӨРТҮҮ ЖАНА ЖОККО ЧЫГАРУУ
6.1. Буйрутманы өзгөртүү, Келишимди аткаруудан толугу менен же жарым-жартылай баш тартуу (Буйрутманы жокко чыгаруу) үчүн Колдонуучу буйрутманы өзгөртүү, жокко чыгаруу процедурасын аткарышы керек, бул тууралуу Аткаруучуга телефон аркылуу оозеки билдирип: +996 505 577 588, +996 225 577 588, +996 880 577 5 88 (күнү-түнү), жана өзгөртүлгөн, жокко чыгарылган (толугу менен же жарым-жартылай) Буйрутманын реквизиттерин көрсөтүү менен жазуу жүзүндөгү суроо-талапты төмөнкү ыкмалардын бири менен тариздөөсү зарыл:
— Аткаруучунун электрондук дарегине: booking@vip-lounge.kg;
— Сайттагы «Сатып алуу» бөлүмүндө, Сайттын нускамаларын жана иштөө логикасын аткаруу менен онлайн;
— Сайттагы жеке кабинетте (корпоративдик Колдонуучулар үчүн).
6.2. Буйрутманы өзгөртүү, Келишимди аткаруудан баш тартуу (Буйрутманы жокко чыгаруу) Аткаруучу Буйрутманы өзгөртүү, Келишимди бузуу (Буйрутманы жокко чыгаруу) жөнүндө билдирүүнү алган учурдан тартып кабыл алынды деп эсептелет.
6.3. Буйрутма толугу менен же жарым-жартылай жокко чыгарылган учурда (Келишимди аткаруудан баш тартуу), жокко чыгарылган Буйрутманын наркы Колдонуучуга анын жазуу жүзүндөгү суроо-талабынын негизинде төлөм жүргүзүлгөн картага которулат. Кайтаруу мөөнөтү Буйрутма жокко чыгарылган күндөн тартып (Колдонуучунун Келишимди аткаруудан баш тарткан күнүнөн тартып) 10 (он) календардык күндү түзөт. Акча каражаттарын Колдонуучунун эсебине чегерүү мөөнөтү Колдонуучунун эсеби ачылган банкка жараша болот.
6.4. Эгерде Буйрутманы өзгөртүү кызмат көрсөтүү башталганга чейин (тиешелүү аэропорттун ырааттамасы боюнча каттамдын учуп кетүү/келүү убактысына чейин) 2 (эки) сааттан аз убакыт калганда жөнөтүлсө, Аткаруучу көрсөтүлгөн өзгөртүүлөрдү кабыл албоого жана Буйрутманы баштапкы вариантында аткарууга укуктуу.
6.5. Эгерде Келишимди аткаруудан баш тартуу (Буйрутманы жокко чыгаруу) кызмат көрсөтүү башталганга чейин (тиешелүү аэропорттун ырааттамасы боюнча каттамдын учуп кетүү/келүү убактысына чейин) 2 (эки) сааттан аз убакыт калганда жөнөтүлсө, төмөнкү кесепеттер колдонулат:
6.5.1. Эгерде кызмат иш жүзүндө көрсөтүлбөсө, анда төлөнгөн акча каражаттары Келишим боюнча милдеттенмелерди аткарууга байланыштуу Аткаруучунун иш жүзүндө тарткан чыгымдарын алып салуу менен кайтарылып берилет.
6.5.2. Эгерде Колдонуучу Келишимден баш тарткан (Буйрутманы жокко чыгарган) учурга чейин Аткаруучу кызмат көрсөтүүнү баштаган болсо, анда кызмат көрсөтүлгөн деп эсептелет жана толук көлөмдө төлөнүүгө тийиш.
7. ТАРАПТАРДЫН ЖООПКЕРЧИЛИГИ
7.1. Тараптар ушул Келишим боюнча өз милдеттерин аткарбагандыгы жана талаптагыдай аткарбагандыгы үчүн Кыргыз Республикасынын колдонуудагы мыйзамдарына ылайык жоопкерчилик тартышат.
7.2. Аткаруучу өзүнүн компетенциясынан тышкаркы окуялардын жана жагдайлардын натыйжасында келип чыккан терс кесепеттер жана чыгымдар үчүн, ошондой эле үчүнчү жактардын аракеттери (аракетсиздиги) үчүн жоопкерчилик тартпайт, анын ичинде, бирок төмөнкүлөр менен чектелбестен:
— Колдонуучу тарабынан берилген маалыматтардын жана документтердин анык эместигинен, жетишсиздигинен жана өз убагында берилбегендигинен же Колдонуучунун ушул Келишимдин шарттарын же документтерге карата талаптарды бузгандыгынан улам өзүнө алган милдеттенмелерди аткаруу мүмкүн эместиги үчүн;
— Колдонуучулар тарабынан Кыргыз Республикасынын бажы мыйзамдарына ылайык товарларды, валютаны жана башка буюмдарды мыйзамсыз алып кирүү/алып чыгуу үчүн;
— Колдонуучуларда паспорттук көзөмөлдөн өтүүдө тиешелүү документтердин жоктугу үчүн;
— Колдонуучулар жана/же аларды тосуп алуучу/узатуучу жактар тарабынан бизнес-, ВИП-залды колдонуу эрежелерин, аба ташуулардын коопсуздук эрежелерин, аэропорттогу чек ара, бажы, санитардык режимдердин талаптарын бузгандыгы үчүн.
7.3. Тараптар Келишим боюнча өз милдеттенмелерин аткарбагандыгы үчүн, эгерде мындай милдеттенмелерди аткарбагандык жеңилгис күч жагдайлардын (форс-мажор) таасиринен улам келип чыккандыгын далилдешсе, жоопкерчилик тартышпайт.
7.4. Тараптар жеңилгис күч жагдайларга Келишим боюнча милдеттенмелерди аткаруучу жердеги табигый кырсыктарды, өрттү, суу ташкынын, жер титирөөнү же башка табигый кырсыктарды, согушту, мобилизацияны же башка өкмөттүк актыларды, ошондой эле Тараптардан иш жүзүндө көз каранды болбогон, бирок ушул Келишим боюнча милдеттенмелерди аткарууга түздөн-түз тоскоол болгон башка жагдайларды киргизишет. Жеңилгис күч жагдайлардын бар экендигинин жана алардын узактыгынын тийиштүү далили болуп тиешелүү мамлекеттик органдардын жана жергиликтүү өз алдынча башкаруу органдарынын, ошондой эле ишмердүүлүгү аба ташуулар менен түздөн-түз байланышкан башка уюмдардын документтери саналат.
7.5. Жеңилгис күч жагдайлар келип чыккан учурда, Келишим боюнча өз милдеттенмелерин аткаруу мүмкүнчүлүгү жок болгон Тарап, жеңилгис күч жагдайлар өзүнө карата күчүнө кирген күндөн тартып 3 (үч) күндүн ичинде, башка Тарапка мындай жагдайлардын келип чыккандыгы жана алардын мүмкүн болгон аракет мөөнөтү жөнүндө жазуу жүзүндө, жеткиликтүү болгон ар кандай ыкма менен билдирүүгө тийиш. Эгерде көрсөтүлгөн мөөнөттө мындай билдирүү жасалбаса, жеңилгис күч жагдайлардын таасирине кабылган Тарап, эгерде ошол жагдайдын өзү билдирүү жөнөтүүгө мүмкүнчүлүк бербесе, аларды өзүн актоо үчүн шилтеме кылуу укугунан ажыратылат.
8. МАРКЕТИНГДИК АКЦИЯЛАР
8.1. Аткаруучу тарабынан көрсөтүлүүчү кызматтарды сатып алууда Колдонуучулардын лоялдуулугун жогорулатуу жана активдүүлүгүн арттыруу максатында, Аткаруучу маркетингдик акцияларды өткөрүүгө укуктуу, алар оюн, сынак, лотерея, сыйлыкты коомдук убада кылуу же тобокелдикке же кокустук утушка негизделген башка иш-чара болуп саналбайт.
8.2. Маркетингдик акцияларды өткөрүү тартиби жана мөөнөттөрү Аткаруучу тарабынан өзүнчө Маркетингдик акция жөнүндө жободо белгиленет, ал жалпы жарыя-сунуш болуп саналбайт жана акциянын катышуучуларына гана багытталган.
8.3. Маркетингдик акциянын предмети болуп маркетингдик акцияда каралган бардык шарттарды аткарган акциянын катышуучуларына Аткаруучу менен кызмат көрсөтүү үчүн эсептешүүдө арзандатууга промокод же Маркетингдик акция жөнүндө жободо каралган башка артыкчылыктарды берүү саналат.
9. ИНТЕЛЛЕКТУАЛДЫК МЕНЧИК
9.1. Сайтта жайгашкан бардык тексттик маалымат жана графикалык сүрөттөр Аткаруучунун жана/же анын контрагенттеринин менчиги болуп саналат жана укук ээлеринин жазуу жүзүндөгү уруксатысыз үчүнчү жактар тарабынан колдонулушу мүмкүн эмес.
9.2. Сайттагы ар кандай материалдарды кайра басып чыгаруу, ар кандай формада кайра чыгаруу, жайылтуу, которуу, өзгөртүү, кайра иштетүү Аткаруучунун жазуу жүзүндөгү уруксатысыз жол берилбейт.
10. КУПУЯЛУУЛУК ЖАНА ЖЕКЕ МААЛЫМАТТАРДЫ КОРГОО
10.1. Тараптар Келишимди түзүүгө жана аткарууга байланыштуу алган бардык маалымат купуя болуп саналат жана Кыргыз Республикасынын мыйзамдарында жана Келишимде каралган учурлардан тышкары, үчүнчү жактарга жарыяланбайт.
10.2. Сайт менен иштөөдө Колдонуучу төмөнкү маалыматтарды берет: фамилиясы, аты, атасынын аты; туулган күнү (12 жашка чейинки балдар үчүн); телефон; электрондук дарек
(e-mail).
10.3. Эгерде Келишим боюнча пайда алуучу жеке маалыматтардын аракетке жөндөмсүз субъектиси болсо, Колдонуучу төмөнкүлөрдү ырастайт: а) эгерде ал анын мыйзамдуу өкүлү болсо, Сайтта кызматтарга буйрутма берүүдө анын жеке маалыматтарын иштетүүгө өз макулдугун берет; б) эгерде ал жеке маалыматтардын аракетке жөндөмсүз субъектисинин мыйзамдуу өкүлү болбосо, ал Сайтта кызматтарга буйрутма бергенге чейин мындай өкүлдөн анын жеке маалыматтарын иштетүүгө керектүү макулдукту алган. Аткаруучу Колдонуучудан көрсөтүлгөн макулдуктарды алгандыгын ырастоону талап кылуу укугун өзүнө калтырат.
10.4. Жеке маалыматтарды иштетүүгө макулдук:
10.4.1. Ушул Офертаны кабыл алуу менен, Колдонуучу өзүнүн жеке маалыматтарын, ошондой эле ал тарабынан ыктыярдуу түрдө жайгаштырылган, Буйрутмада аты аталган жана Келишим боюнча пайда алуучу болуп саналган жүргүнчүлөрдүн жеке маалыматтарын, Сайтта жайгаштырылган жеке маалыматтарды иштетүүнүн купуялуулук саясатына ылайык иштетүүгө өз макулдугун берет. Колдонуучу өзү берилүүчү жеке маалыматтардын субъектиси экендигин жана Кыргыз Республикасынын «Жеке мүнөздөгү маалымат жөнүндө» Мыйзамында каралган укуктары жана милдеттери ага белгилүү экендигин ырастайт. Анын жеке маалыматтарын жана Буйрутмада аты аталган жүргүнчүлөрдүн жеке маалыматтарын иштетүү Кыргыз Республикасынын мыйзамдарына ылайык жүргүзүлөт.
Аткаруучу жеке маалыматтарды ушул Офертанын 10.4.7-пунктунда көрсөтүлгөн максаттарда иштетет. Аткаруучу жеке маалыматтарды укукка жатпаган жетүүдөн, өзгөртүүдөн, ачыкка чыгаруудан же жок кылуудан коргоо үчүн бардык зарыл чараларды көрөт.
10.4.2. Иштетүүгө берилүүчү жеке маалыматтардын тизмеси ушул Офертанын 10.2-пунктунда көрсөтүлгөн.
10.4.3. Жеке маалыматтарды иштетүү деп жеке маалыматтарды чогултуу, жазуу, сактоо, актуалдаштыруу, топтоо, бөгөттөө, өчүрүү жана жок кылуу максатында автоматташтыруу каражаттарын колдонуу менен же мындай каражаттарды колдонбостон аткарылуучу ар кандай аракет (операция) же аракеттердин (операциялардын) жыйындысы түшүнүлөт.
10.4.4. Жеке маалыматтарды иштетүүнү Аткаруучу – «ВИП Лаундж» ЖЧКсы ишке ашырат. Сайт менен иштөөдө өзүнүн жеке маалыматтарын берүү менен, Колдонуучу аларды Аткаруучу тарабынан иштетүүгө макул болот. Аткаруучу Келишимди аткаруу максатында, Келишимди аткаруу үчүн Аткаруучу тарабынан тартылган үчүнчү жактарга Колдонуучудан алынган маалыматты берүүгө укуктуу. Мындай маалыматты берүү ушул Офертанын жоболорун бузуу болуп саналбайт.
10.4.5. Тарабы Колдонуучу болгон, ал эми пайда алуучу Буйрутмада аты аталган үчүнчү жак болгон Келишимдин негизинде ишке ашырылуучу жеке маалыматтарды иштетүү Аткаруучу тарабынан үчүнчү жактардын Колдонуучу тарабынан берилген макулдугу менен ишке ашырылат. Колдонуучунун, үчүнчү жактардын жеке маалыматтарын иштетүүгө макулдук Келишимди түзүү үчүн милдеттүү шарт болуп саналат. Үчүнчү жактын кызыкчылыгында Келишимди түзүү менен, Колдонуучу Буйрутмада көрсөтүлгөн жактын жеке маалыматтарын иштетүүгө макулдугунун бар экендиги үчүн жоопкерчиликти өзүнө алат. Аткаруучу Колдонуучудан көрсөтүлгөн макулдукту алгандыгын ырастоону талап кылуу укугун өзүнө калтырат.
10.4.6. Колдонуучу Аткаруучуга берилген маалымат үчүнчү жактардын укуктарын бузбай тургандыгын ырастайт.
10.4.7. Аткаруучу жеке маалыматтарды төмөнкү максаттарда иштетет:
— Сайтта каттоо (авторизация), Сайтка кирүү мүмкүнчүлүгүн берүү жана мындай аракеттерге байланыштуу башка бардык учурларда.
— Колдонуучуга жана/же үчүнчү жакка Сайттын жекелештирилген ресурстарына, ошондой эле Сайтта камтылган кызматтарга, маалыматтарга жана/же материалдарга жеткиликтүүлүктү берүү. — Колдонуучу менен кайтарым байланышты түзүү, анын ичинде электрондук каттарды жөнөтүү, Сайтты колдонууга, кызмат көрсөтүүгө байланыштуу суроо-талаптарды жөнөтүү, Колдонуучудан келген суроо-талаптарды жана Буйрутмаларды иштетүү.
— Эгерде Колдонуучу эсеп жазуусун түзүүгө макулдук берсе, эсеп жазуусун түзүү.
— Жарандык-укуктук келишимдерди түзүү, аткаруу жана токтотуу.
— Сайтты колдонууга байланыштуу көйгөйлөр келип чыкканда Колдонуучуга жана/же үчүнчү жакка натыйжалуу кардардык жана техникалык колдоо көрсөтүү.
— Сайттын иштөө жөндөмдүүлүгүн жана коопсуздугун камсыз кылуу, Колдонуучулар тарабынан жасалган аракеттерди ырастоо, алдамчылык, компьютердик чабуулдар жана башка кыянаттыктардын алдын алуу, ошондой эле мындай учурларды иликтөө үчүн.
— Колдонуучунун алдын ала макулдугун алган шартта, Колдонуучуга жарнамалык-маалыматтык мүнөздөгү билдирүүлөрдү жөнөтүү.
10.4.8. Кыргыз Республикасынын мыйзамдарынын негиздүү жана колдонулуучу талаптарына ылайык маалыматты жарыялоо милдеттенмелерди бузуу болуп эсептелбейт.
10.4.9. Жеке маалыматтарды иштетүүгө макулдук Келишим түзүлгөн учурдан тартып күчүнө кирет жана мөөнөтсүз иштейт. Макулдук жеке маалыматтарды иштетүүнүн купуялуулук саясатына ылайык Аткаруучуга жазуу жүзүндө арыз берүү аркылуу кайтарылып алынышы мүмкүн.
11. ТАЛАШ-ТАРТЫШТАРДЫ ЧЕЧҮҮ ТАРТИБИ
11.1. Тараптардын ортосунда келип чыккан бардык талаш-тартыштар сүйлөшүүлөр аркылуу чечилет. Колдонуучунун ар кандай дооматтары Аткаруучу тарабынан 30 (отуз) күндүн ичинде каралат.
11.2. Эгерде Тараптар сүйлөшүүлөрдүн натыйжасында макулдашууга жетишпесе, талаш-тартыш Кыргыз Республикасынын колдонуудагы мыйзамдарына ылайык чечилүүгө тийиш.
12. КЕЛИШИМДИН КОЛДОНУЛУУ МӨӨНӨТҮ
12.1. Келишим Аткаруучу Сайтта жайгаштырылган ушул Офертанын акцептин алган учурдан тартып күчүнө кирет, өзүнүн аракетин ушул Офертанын акцептинин учурунан тартып келип чыккан Тараптардын мамилелерине жайылтат жана Тараптар Келишим боюнча бардык милдеттенмелерин толук аткарганга чейин күчүндө болот.
12.2. Келишим Тараптардын макулдашуусу боюнча мөөнөтүнөн мурда бузулушу мүмкүн.
12.3. Аткаруучу Келишимди аткаруудан бир тараптуу соттон тышкаркы тартипте төмөнкү учурларда баш тартууга укуктуу:
12.3.1. Колдонуучу тарабынан Келишимдин шарттарын бир нече жолу (эки же андан көп жолу) бузуу.
12.3.2. Колдонуучу же Буйрутмада көрсөтүлгөн үчүнчү жак тарабынан бизнес-, ВИП-залдарды колдонуу эрежелерин, аба ташуулардын коопсуздук эрежелерин, аэропорттогу чек ара, бажы, миграциялык, санитардык-карантиндик көзөмөлдүн талаптарын бузуу, бул бизнес-, ВИП-залдардын ишмердүүлүгүн көзөмөлдөгөн жана аба ташууларынын коопсуздугун камсыз кылган расмий түзүмдөрдүн расмий билдирүүлөрүнө жана жазуу жүзүндөгү дооматтарына алып келет.
12.3.3. Колдонуучу тарабынан Аткаруучунун талабы боюнча Буйрутмада аты аталган жүргүнчүлөрдүн жеке маалыматтарын иштетүүгө макулдукту кагаз түрүндө бербөө, ошондой эле Колдонуучу тарабынан ушул Келишимдин 10.3, 10.4.4-пункттарында көрсөтүлгөн милдеттенмелерди аткарбоо.
12.3.4. Келишимдин 12.3.1−12.3.3-пункттарында саналган ар бир учурда Аткаруучу Буйрутмада көрсөтүлгөн электрондук почта аркылуу Келишимди аткаруудан бир тараптуу баш тартуу жөнүндө билдирүү жөнөтөт. Келишим, эгерде билдирүүдө башкача көрсөтүлбөсө, мындай билдирүү жөнөтүлгөн күндөн кийинки күндөн тартып бузулду деп эсептелет.
Аткаруучу
«ВИП Лаундж» жоопкерчилиги чектелген коому Дареги: 720 001, Бишкек ш., Биринчи май району, Абдрахманов көч., 176-үй, 28-батир
Почта дареги: 720 001, Бишкек ш., Биринчи май району, Абдрахманов көч., 176-үй, 28-батир
ЖСН 2 506 202 510 054
ИУЖК 33 994 760
«МБанк Премиум» филиалы
«МБанк» ААК
БИК: 103 002
а-б./эсеп: 1 030 220 077 784 871 (көп валюталуу)
E-mail: premium@vip-lounge.kg
Тел.: +996 555 688 188
